Walang plataporma. Walang programa.

Katawatawa ang pahayag ni Quezon City Mayor Joy Belmonte sa pagsabi na hindi raw naman siya nagmamadali dahil mahaba naman ang termino niya para makagawa ng kabutihan para sa lungsod. Hindi niya yata nahalata na isang rason kung bakit nabisto na wala siyang nagawa ay sapagkat sa sandaling panahon na tatlong linggo, sangkatutak na ang naipatupad sa Lungsod ng Maynila. Habang si Manila Mayor Isko Moreno ay tumatanggap ng maraming pagpuri kaugnay ng paglinis ng mga kalsada mula sa nakabarang mga nagtitinda, ang Quezon City naman ay kulang sa pagkilos laban sa basura, nakaparadang sasakyan, maruming palengke at mga sagabal sa mga kalsada.

Maliwanag na walang programa ang bagong mayora sapagkat kung mayroon, bakit hindi niya isiniwalat sa madla para malaman ng lahat kung ano ang mga plano niya at kung saang larangan magkakaroon ng paglilinis o pagbabago.